Presentación do Proxecto Rotopala en Santiago de Compostela

Dende VideodinamizArte e en colaboración coa Fundación Eugenio Granell, de Santiago de Compostela, faremos a presentación do Proxecto Rotopala o próximo Mércores 20 de Novembro ás 20 horas.

Baixo o nome Proxecto Rotopala atopamos unha iniciativa transnacional que pretende botar unha nova ollada ao patrimonio industrial de dúas vilas mineiras: As Pontes (A Coruña) e Konin (Polonia).

A través de dous Obradoiros de Videocreación realizados ao longo dos meses de Agosto e Setembro de 2012, con mozos e mozas de ambas vilas, resultaron varias curtametraxes que reflicten as miradas persoais dos habitantes máis novos de ambos contextos e que pretenden integrar eses espazos dende unha nova perspectiva.

Ese día a coñeceremos máis polo miúdo o que deu de si a historia das dúas rotopalas (maquinaria de extracción de carbón de gran tamaño) que foron vendidas tralo peche da mina de As Pontes, e que foron bautizadas ao chegar a Polonia como “Carmen” e “Dolores”. Todo a través das pezas audiovisuais realizadas polos rapaces en colaboración transnacional.

A nosa pretensión é aproveitar este encontro para abrir un espazo de reflexión sobre o patrimonio industrial e a forma de percibilo da poboación.
Para isto estaremos acompañados por convidados que ampliarán a mirada sobre este tema, tanto dende o mundo da arte como a nivel sociolóxico. Intervencións que ilustrarán:
– O contexto pontés e a relación da actividade económica mineira ca contorna, da man de Marisol Souto, traballadora da mina.
– O contexto polaco e a importancia da minería na súa sociedade, de man de Marek Grzeszczyk, xeógrafo polaco.
– Outras olladas contemporáneas ao patrimonio industrial galego a través da mirada de J.F. Chas, artista adicado á fotografía.
– Novas posibilidades de xestionar estes espazos implicando á sociedade, da man de María Ríos arquitecta pertencente ao colectivo Tankollectiff.

Agardámosvos a tod@s o mércores 20 ás 20.00 horas, para compartir con nós esta experiencia e poñer novas miradas sobre o patrimonio industrial.